Como desalgar o bacallau

Sempre que vendemos o bacallau tanto na nosa tenda física como virtual, damos unhas pequenas pautas, moi sinxelas, para o desalgado do bacallau. É, sen dúbida, a parte máis importante para conseguir un prato substancioso e saboroso, pero, podemos evitar como pasarnos de desalgado ou quedarnos curto?
O bacallau é un peixe que comezou a conservarse en salgadura dende hai moitos anos debido a que, antigamente carecían das técnicas de conservación das que dispoñemos agora, e ao dar ese toque de sabor que lle falta ao bacallau fresco se conservou no tempo ata a actualidade.

O primeiro consello é que á hora de comprar o bacallau, este estea no seu punto de “curación” é dicir, que o bacallau non estea demasiado seco, tradicionalmente mesmo se colgaban as follas de bacallau para que conservalas máis tempo, agora iso é innecesario cos nosos frigoríficos e conxeladores. Desbotade sempre o bacallau con rixidez pola curación.

Unha vez na casa, para comezar co desalgado, lavamos suavemente os anacos de bacallau na billa de auga fría.

Colocamos o bacallau nun recipiente (poñer unha reixa debaixo dos anacos ou acomodalos coa pel para arriba axuda ao proceso), cubrímolos con auga fría e introducímolos na neveira 

O tempo de desalgado depende do grosor dos anacos e do gusto particular no salgado dos pratos. Uns lombos de bacallau dun grosor superior (4 cm ou máis) mesmo poden necesitar 72horas.

Como pauta xeral podemos tomar as seguintes:

  • Lombos e follas grosas – 60/72horas
  • Follas, cocochas e lombos de grosor medio – 48horas
  • Migas, ás, cabezas como as partes máis finas – 24horas

Renovaremos a auga dúas veces ao día, (mañá e noite)

*Consello Ferreiro

Para asegurarnos de que o bacallau está no seu punto, podemos probar un anaquiño antes de cociñalo
Se queredes conxelar o bacallau desalgado, deixalo un tempo a escorrer a auga sobrante e se queredes cociñalo á prancha, ademais, teredes que sacalo un pouco cun pano.